〈好遊〉藝文青一日閑遊 油麻地藝遊東南

作為精品酒店又點少得一個明確主題呢？呢間位於油麻地嘅東南樓藝術酒店就將多元化嘅藝術元素融入酒店每個角落，我哋就喺呢度玩2日1夜Staycation（詳情：文青藝術深度遊 東南樓藝術酒店）。但就算你無計劃入嚟住番晚，都可以買藝遊東南一日通行證，發揮你嘅創意，同藝術展品打卡，作為文青又或者藝術愛好者又點可以錯過呢！

藝遊東南
藝遊東南有唔同嘅工作坊同專題展覽，讓訪客以視覺、聽覺、嗅覺、味覺同觸覺去感受作品。由1樓嘅尋香工作室、2樓嘅Art Lab、3樓嘅自修空間、位於22樓不定期開放嘅藝廊同23樓嘅room68，都有唔同嘅互動藝術體驗活動，加上每一層都有唔同藝術家創作嘅壁畫同瓷磚牆，甚至連後樓梯都有唔少驚喜，夾夾埋埋超過100件嘅作品，真係打卡都打足大半日！

1樓壁畫
酒店鼓勵大家探索油麻地大街小巷，所以1樓嘅壁畫就係以油麻地果欄為題嘅「果欄黑夜」。

尋香工作室
工作室內放有唔同嘅天然香料，但無任何文字標示，全靠用嗅覺去聞，製作一個專屬你嘅天然香包。

花樣年華試身室
東南樓有唔少設計彷彿回到七十年代，可以租番件旗袍或古服，配合旁邊嘅電話房復古場景，打卡一流㗎！

Art Lab
實驗室內放有多種創作材料，可以摺紙、畫畫、編織刺繡同音樂創作等，總之就可以發揮你嘅無限創意，創作你嘅藝術紀念品。

Soul Room
呢度有唔同種類嘅藝文書籍，可以了解更多關於香港本土文化、設計、藝術同童話故事等。

3樓壁畫
3樓嘅壁畫就係手繪嘅「霸王別姬」劇照。

自修空間
為咗讓視障人仕都可以感受畫作，呢度就有唔少突字畫喇。

後樓梯壁畫
其實酒店真係有好多驚喜，就連後樓梯都唔放過，好多壁畫俾你打卡㗎！

藝廊
位於22樓嘅藝廊可以購買藝術家寄賣嘅作品，同從外地搜購嘅特式藝術品，讓屋企都增加唔少藝術氣息。